ترجمان مسلم  لیگ مریم اورنگزیب نے کہا کہ حکومت تاثر دے رہی ہے کہ ہم ادارو ں کے خلاف ہیں ۔

قومی اسمبلی میں قائد حزب اختلاف شہباز شریف کی لاہور ہائی کورٹ میں پیشی کے موقع پر میڈیا سے گفتگو کرتے ہوئے انہوں نے کہا کہ شہباز شریف کے خلاف بے نامی درخواست دی گئی ہے۔

مریم اورنگزیب نے کہا کہ پاکستان تحریک انصاف فارن فنڈنگ اکاؤنٹس کے بارے میں کوئی پوچھنے والا نہیں۔ 6 سال سے عمران خان 23 فارن فنڈنگ کیس میں مفرور ہیں اور جواب نہیں دے رہے۔

ان کا کہنا تھا کہ پارلیمانی رہنماؤں کی آرمی چیف جنرل قمر جاوید باجوہ سے  ملاقات میں گلگت بلتستان سے متعلق  بات ہوئی تھی۔ آرمی چیف سے ملاقات کی تفصیل نہیں جانتی۔

مریم اورنگزیب کا کہنا تھا کہ ملک کو سی پیک دینے، ایٹمی طاقت بنانے، لوڈشیڈنگ ختم کرنے والے آج عدالتوں میں پیشیاں بھگت رہے ہیں۔ پشاور بی آر ٹی کے 126 ارب کے کھڈوں کا کوئی نام نہیں لے رہا ہے۔

مریم اورنگزیب کا کہنا تھا کہ اگر حزب اختلاف کی جماعتوں کی اے  پی سی  یا نواز شریف کی تقریر غیر اہم تھی تو وزرا  کی ٹانگیں کیوں کانپ رہی ہیں؟