وفاقی وزیر برائے مواصلات مراد سعید نے کہا ہے کہ‏وزیراعظم عمران خان نے ایک دفعہ پھر دنیا کے سامنے دہشت گرد مودی کو بے نقاب کیا ہے۔

 تفصیلات کے مطابق وفاقی وزیر برائے مواصلات مراد سعید نے اپنے بیان میں کہا کہ وزیراعظم عمران خان ایک مرتبہ پھر ‏کشمیر کے سفیر اور عالم اسلام کے ترجمان بن کر ابھرے ہیں۔

 مراد سعید نے کہا کہ وزیراعظم نے اظہار رائے کی آزادی کے نام پر مسلمانوں کی دل آزاری، کشمیریوں پر بھارتی مظالم اور فلسطینیوں کے حقوق پر دو ٹوک موقف اپنا کر عالم اسلام کی بہترین نمائندگی کی۔

وفاقی وزیر برائے مواصلات نے یہ بھی کہا کہ پوری قوم اور مظلوم کشمیری و فلسطینی مسلمان بیک زبان شکریہ عمران خان کہہ رہے ہیں۔

مراد سعید کا کہنا تھا کہ ماحیاتی تغیر کے معاملے کو بھی وزیراعظم نے نہایت مؤثر انداز میں دنیا کے سامنے رکھا ہے جبکہ وزیراعظم نے کوروناء سے نمٹنے کیلئے سمارٹ لاک ڈاؤن کی افادیت اقوام عالم کے سامنے رکھی ہے

وفاقی وزیر برائے مواصلات مراد سعید کا مزید کہنا تھا کہ وزیراعظم نے غریب اور ترقی پذیر ممالک سے منی لانڈرنگ کے ذریعے امیر اور ترقی یافتہ ممالک میں منتقل کی جانے والی دولت اور اسکے تباہ کن نتائج پر بھی دنیا کو جھنجھوڑا ہے۔