مقبوضہ کشمیر میں بھارتی فورسز نے ریاستی دہشت گردی کرتے ہوئے مزید ایک نوجوان کو شہید کردیا۔

کشمیر میڈیا سروس (کے ایم ایس) کے مطابق مقبوضہ کشمیرمیں قابض بھارتی فوج کی ریاستی دہشت گردی رک نہ سکی، تازہ کارروائی کے دوران قابض فورسزنے مقبوضہ وادی کے ضلع بڈگام میں جعلی آپریشن کی آڑ میں کشمیری نوجوان کو شہید کردیا۔

کے ایم ایس کے مطابق قابض بھارتی فوج کا مقبوضہ کشمیر کے دارلحکومت سری نگر، پلواما اور شوپیاں کےعلاقوں کا محاصرہ کرکے گھر گھر تلاشی کا عمل جاری ہے جبکہ علاقے کے داخلی وخارجی راستوں کو بھی بند کردیا گیا ہے تاہم علاقے میں انٹرنیٹ، موبائل فون سروس سمیت تمام مواصلاتی سسٹم معطل ہے۔

دوسری جانب مقبوضہ وادی میں ظالمانہ کارروائیوں کے خلاف کشمیریوں کااحتجاج جاری ہے۔

خیال رہے کہ 5 اگست 2019 کو بھارت نے مقبوضہ کشمیر کی خصوصی اور الگ حیثیت کا خاتمہ کرکے اسے بھارت کا غیر قانونی طور پر حصہ بنا لیا تھا جبکہ مقبوضہ وادی پر قابض بھارت کے کرفیو کو 13 ماہ سے زائد ہوچکے ہیں۔