اسلام آباد پولیس نے ایس ای سی پی افسر ساجد گوندل کیس کا دائرہ وسیع کرتے ہوئے ملازمین کو بھی تفتیش میں شامل کرلیا، جب کہ قانون نافذ کرنے والے اداروں کی جانب سے 8 ستمبر کو جائے وقوعہ کا دورہ بھی کیا گیا۔

تفصیلات کے مطابق سیکیورٹیز اینڈ ایکسچینج کمیشن آف پاکستان (ایس ای سی پی) کے جوائنٹ ڈائریکٹر ساجد گوندل جوائنٹ کے مبینہ طور پر لاپتا ہونے کے معاملے پر سینئر افسران نے دیگر تفتیشی ٹیموں کے ہمراہ جائے وقوعہ کا دورہ کیا۔

اس موقع پر افسران کی جانب سے جوائنٹ ڈائکریکٹر کو جلد بازیاب کرنے کی ہدایت کی گئی۔

سینیر افسران کا کہنا تھا کہ مغوی کی بازیابی کے لیے تمام تر وسائل بروئے کار لائے جائیں گے۔ جب کہ کیس کا دائرہ وسیع کرتے ہوئے ایس ای سی پی کے ملازمین کو بھی شامل تفتیش کرلیا گیا ہے۔