وزیراعظم عمران خان اتوار کو گلگت بلتستان کا دورہ کریں گے۔

تفصیلات کے مطابق گلگت بلتستان کے دورے کے دوران وزیراعظم گلگت بلتستان کے قومی دن کی تقریب میں شریک ہوں گے۔

ذرائع کا کہنا ہے کہ وزیراعظم عمران خان تقریب سے خطاب بھی کریں گے۔

ذرائع کا مزید کہنا ہے کہ تقریب میں گورنر گلگت بلتستان، نگران وزیراعلیٰ گلگت بلتستان بھی شریک ہوں گے۔

واضح رہے اس سے قبل اسلام آباد میں  قومی رحمت للعالمین ﷺ کانفرنس سے خطاب کرتے ہوئے وزیراعظم نے کہا تھا کہ ہم ہر سال رحمت اللعالمین کانفرنس کا انعقاد کریں گے،ہمیں اپنے عوام بالخصوص نوجوانوں کو سیرت النبی ﷺکے بارے میں آگاہی دینی ہے۔

عمران خان کا کہنا تھا کہ ہمیں اپنے نوجوانوں کو حضرت محمد ﷺ کی زندگی کے بارے میں بتانا ہے، اس لیے ہم نے فیصلہ کیا ہے کہ ہم آٹھویں نویں اور دسویں جماعت میں نبی کریم ﷺ کی سیرت سے متعلق مضامین شامل کریں گے۔

وزیراعظم کا مزید کہنا تھا کہ مغرب کے لوگوں کو سمجھ نہیں کہ ہمارا نبی ﷺسےکیسا رشتہ ہے، مغربی معاشرے میں وہ ادب نہیں جو ہمارے معاشرے میں ہے،جب تک اسلامو فوبیا کو ایڈریس نہیں کریں گے یہ بڑھے گا۔