صدر پی ٹی آئی کراچی خرم شیر زمان نے کہا ہے کہ جزائر کے متعلق سندھ حکومت بدنیتی میں ہمیشہ کی طرح آگے ہے۔

تفصیلات کے مطابق صدر پی ٹی آئی کراچی خرم شیر زمان نے میڈیا سے گفتگو کرتے ہوئے کہا کہ سندھ حکومت میر جعفر کا کردار ادا کررہی ہے۔

خرم شیر زمان نے کہا کہ سندھ حکومت جزائر کے بدلے این آر او مانگتی رہی جبکہ اپنے دور میں پی پی نے ان جزائر کو کوڑیوں کے بھاؤ بیچنے کی کوشش کی۔

صدر پی ٹی آئی کراچی نے یہ بھی کہا کہ این آر او نہ ملنے پر سندھ حکومت کو سندھ کے حقوق یاد آجاتے ہیں۔

خرم شیر زمان کا کہنا تھا کہ سندھ کی ترقی میں سندھ کی عوام کا پہلا حق ہے اور کراچی کی ترقی پر یوٹرن لیکر پی پی نے آمرانہ سوچ کی مثال قائم کی ہے۔

صدر پی ٹی آئی کراچی خرم شیر زمان کا مزید کہنا تھا کہ گورک ہل اسٹیشن سمیت کئی منصوبے پی پی بیچ چکی ہے، سندھ حکومت سے سندھ کی عوام کے حقوق چھین کر لیں گے۔

واضح رہے اس سے قبل کراچی میں پریس کانفرنس کرتے ہوئے خرم شیرزمان نے کہا تھا کہ پیپلز پارٹی نے اپنے گیارہ سالہ دور اقتدار میں سوائے کرپشن کے کچھ نہیں کیا ۔ پیپلز پارٹی روٹی کپڑا مکان کے اپنے ہی نعرے میں بری طرح ناکام ہوچکی ہے۔

پی ٹی آئی رہنما نے کہا تھا کہ اب صوبائی حکومت کی نظر کراچی پیکج پر ہے ، وفاق پورے گیارہ سو ارب اپنے ہاتھ میں ہی رکھے گی ، پیپلز پارٹی کے کرپشن کے کوئی چانسز نہیں ہیں۔

خرم شیر زمان نے کہا کہ  وفاق ساڑھے تین سو ارب جبکہ جو پیسہ بچ رہا ہے وہ حکومت سندھ کراچی پیکج کے تحت شہر پر خرچ کرے گی اور کراچی میں مرحلہ  وار ترقیاتی کاموں کا جلد آغاز ہوگا۔