وزیرِ اعظم عمران خان نے کہا ہے کہ برآمدات میں اضافہ اور دولت کی پیداوار حکومت کی اولین ترجیح ہے۔

تفصیلات کے مطابق وزیرِاعظم عمران خان کی  مختلف شعبوں سے تعلق رکھنے والے مینوفیکچررز اور مختلف ایسوسی ایشن کے نمائندگان سے ملاقات ہوئی۔

ملاقات میں وفد ممبران نے فارما، سیمنٹ، ٹیکسٹائل، کیمیکلز، ہوم اپلائنسز، پیکیجنگ و دیگر صنعتوں کی نمائندگی  کی جبکہ مختلف شعبوں سے متعلق معاملات، درپیش مسائل اور ان مسائل کے حل کے سلسلے میں کی جانے والی حکومتی کوششوں پر بات چیت بھی کی۔

اس موقع پر وفد نے اقدامات، چھوٹی اور درمیانی صنعتوں اور دیگر انڈسٹری کے حوالے سے حکومتی اقدامات کو سراہا اور صنعتی شعبے کے مزید فروغ اور ان کی سہولت کاری کے حوالے سے مختلف تجاویز وزیرِ اعظم کو پیش کی گئی۔

ملاقات میں وزیراعظم عمران خان نے کہا کہ حکومت صنعتی شعبے کے فروغ کے حوالے سے ہر تجویز کا خیر مقدم کرتی ہے جبکہ برآمدات میں اضافہ اور دولت کی پیداوار حکومت کی اولین ترجیح ہے

عمران خان نے یہ بھی کہا کہ چاہتے ہیں ملکی معیشت مستحکم ہو جبکہ حکومت صنعتی شعبے کی سہولت کاری اور ان کو تمام ممکنہ مراعات فراہم کرنے کے لئے پر عزم ہے۔

وزیراعظم عمران خان نے مزید کہا کہ تعمیرات اور صنعتی شعبے کے فروغ سے معاشی عمل میں تیزی آئے گی جبکہ نوکریوں کے بہتر اور زیادہ مواقع پیدا ہوں گے۔

وفد میں میاں ذکاء الرحمان، اعظم فاروقی، انیس خواجہ، میاں ادریس، عمر احسن خان ، شاہد عبداللہ، کریم عزیز ملک، عباس اکبر خان، عاطف اکرم شیخ، سعادت اعجاز اور الماس حیدر ، محمد حماد اظہر، عبدالرزاق داؤد، ڈاکٹر عبدالحفیظ شیخ، گورنر سٹیٹ بنک آف پاکستان ڈاکٹر رضا باقر و دیگر سینئر افسران بھی ملاقات میں شریک ہوئے۔