مسلم لیگ(ن) پنجاب کی ترجمان عظمیٰ بخاری نے کہا ہے کہ مریم نواز اور حمزہ شہباز ایک پیج پر ہیں۔

تفصیلات کے مطابق مسلم لیگ(ن) پنجاب کی ترجمان عظمیٰ بخاری نے فیاض چوہان کی پریس کانفرنس پر ردعمل دیتے ہوئے کہا کہ چوہان صاحب ایک مذہبی تقریب کو سیاست کیلیے آپ ہی استعمال کر سکتے ہیں۔

مسلم لیگ(ن) پنجاب کی ترجمان نے کہا کہ چوہان صاحب آپ لوگ اپنے پیج کی فکر کریں آپ کے لوگوں کے صحفے پلٹنے شروع ہو گئے ہیں۔

عظمیٰ بخاری نے یہ بھی کہا کہ شریف فیملی کو تیس سالوں سے توڑنے اور کمزور کرنے کی کوششں کی جارہی ہیں لیکن مسلم لیگ(ن) کا بیانیہ نوازشریف سے شروع اور ختم ہوتا ہے۔

مسلم لیگ(ن) پنجاب کی ترجمان کا کہنا تھا کہ ریاست کا نام عمران خان نہیں ریاست پارلیمنٹ،فوج اور عدلیہ کا نام ہے جبکہ نوازشریف سے زیادہ پارلیمنٹ ،فوج اور عدلیہ کو کسی نے مضبوط نہیں کیا۔

عظمیٰ بخاری کا یہ بھی کہنا تھا کہ عمران خان نے امریکہ،افغانستان اور ایران میں بیٹھ کے پاک فوج کےخلاف جو زبان درازی کی وہ بھی ریکارڈ پر موجود ہے۔

مسلم لیگ(ن) پنجاب کی ترجمان عظمیٰ بخاری کا مزید کہنا تھا کہ غدار غدار کا چورن اور غداری کے سرٹیفکیٹ اب عمران نیازی اور اس کے حواریوں کو بچانہیں سکتے، مریم نواز ،مولانا فضل الرحمن اور بلاول بھٹو ووٹ چور اور بکسے چوروں کی چھٹی کرائیں گے۔

واضح رہے اس سے قبل لاہور میں میڈیا سے گفتگو کرتے ہوئے پنجاب کے وزیر اطلاعات فیاض الحسن چوہان نے کہا تھا کہ آل شریف میں سخت پھوٹ پڑچکی ہے، مریم نواز ن لیگ کو اپنے نام سے رجسٹرڈ کرنے کیلئے مشاورت کررہی ہیں۔

انہوں نے کہا تھا کہ مولانا فضل الرحمان نے مریم نواز اور نوازشریف کو پیغام بھجوایا ہےکہ آپ کے بیانیے کا بوجھ زیادہ دیر نہیں اٹھا سکتے، آل شریف ملک کو کمزور کرنے کی سازش کررہی ہے۔ مولانا فضل الرحمان کے رائٹ ہینڈ نے بھی کہا کہ اس بیانیے کو تسلیم نہیں کرسکتے۔