وزیراعظم عمران خان نے کہا ہے کہ پاکستان کشمیری عوام کے ساتھ کندھے سے کندھا ملا کر کھڑا رہے گا۔

تفصیلات کے مطابق یوم سیاہ کشمیر پر وزیراعظم عمران خان نے اپنے ایک پیغام میں کہا کہیوم سیاہ کشمیر انسانی تاریخ کے ایک تاریک باب کی نمائندگی کرتا ہے، یہ دن بھارتی غیرقانونی قبضے کی مذمت اور کشمیری عوام کو اپنی حمایت کا اعادہ  کے لئے منارہے ہیں۔

وزیراعظم نے کہا کہ آج سے 73 سال  پہلے بھارتی فورسز جموں و کشمیر کے لوگوں پر زبردستی قبضہ کرنے کے لئے سری نگر پہنچیں۔

عمران خان نے یہ بھی کہا کہ جموں کشمیرتنازعہ کا حل اقوام متحدہ کی متعلقہ قراردادوں میں موجود ہے جبکہ بھارت کا جموں و کشمیر کے کچھ حصوں پر غیرقانونی قبضہ ایک بین الاقوامی تنازعہ کی نمائندگی کرتا ہے۔

وزیراعظم کا کہنا تھا کہ سات دہائیوں سے بلا اشتعال مظالم کے باوجود بھارت کشمیری عوام کےعزم کو توڑنے میں ناکام ہے۔

عمران خان کا یہ بھی کہنا تھا کہ مقبوضہ کشمیر میں فوجی محاصرے اور 5 اگست کے یکطرفہ اقدام نے ‘ہندوتوا’ نظریہ کو بے نقاب کیا، ہندوتوا نظریے اور اکھنڈ بھارت ڈیزائن کا امتزاج علاقائی امن و استحکام کے لیے خطرہ ہے۔

وزیرِاعظم نے کہا کہ جموں و کشمیر تنازعہ کی بین الاقوامی قانونی حیثیت اقوام متحدہ کی قراردادوں میں شامل ہے۔

عمران خان نے کہا کہ ممبر ممالک کی اجتماعی ذمہ داری ہے کہ وہ بھارت سے اپنی بین الاقوامی ذمہ داریوں کی تعمیل کو یقینی بنائے جبکہ عالمی برادری ہندوستان کو ریاستی دہشت گردی کے ذریعے خطے کو غیر مستحکم کرنے کی کوشش سے روکے۔

وزیراعظم عمران خان نے مزید کہا کہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق  تنازعہ کے پرامن حل کے لئے کام کرے۔