معاون خصوصی وزیراعظم شہباز گل نے کہا ہے کہ اپوزیشن اتحاد نے اپنا مال بچانے کیلئے نامناسب باتیں کی ہیں، ان کے اتحاد میں شامل 11 جماعتوں کے پیچھے ہندوستان ہے۔

شہباز گل نے میڈیاسے گفتگو کرتے ہوئے کہا کہ دو دن پہلے لوگوں نے گوجرانوالہ میں سرکس دیکھا۔ اپوزیشن اتحاد میں شامل تمام جماعتیں اپنے مفاد کے لیے اکٹھی ہوئی ہیں اور ان 11 جماعتوں کے پیچھے ہندوستان ہے۔

شہباز گل کا نواز شریف کو مخاطب کرتے ہوئے کہناتھا کہ پاکستانی عوام آپ کے لندن میں تیار کردہ ملک دشمن بیانیے کے ساتھ کھڑے نہیں ہو سکتے اور ہمیں نہیں معلوم تھا کہ لندن میں بیٹھے نواز شریف اتنے بزدل ہیں جنہوں نے ہمیشہ عوام کا پیسہ لوٹا ہے۔

پیپلز پارٹی چئیرمین بلاول بھٹو سے متعلق معاون خصوصی نے کہا کہ بلاول پتہ نہیں آکسفورڈ میں کیا پڑھتے رہے کہ انہیں پاکستانی تاریخ کا معلوم ہی نہیں ہے۔ عوام اپوزیشن کی باتوں میں نہیں آئے گی۔

شہباز گل کا مزید کہنا تھا کہ پیٹرولیم ڈویژن نے ماضی میں خرم دستگیر کو پیٹرول پمپ کے لیے جعلی این او سی دیا تھا، خرم دستگیر آپ نے جو لوٹ مار کی ہے آپ سے اس کا حساب لیا جائے گا۔ جعلی این او سی میں نمبر ہائی وے کا ہے جو کسی کو جاری نہیں ہو سکتا۔

انہوں نے کہا کہ خرم دستگیر کے والد نے چڑیا گھر کی زمین بھی اپنوں کو دلائی۔ نواز شریف آپ کے بھائی نے بھی نوکروں کے نام پر اربوں روپے کی منی لانڈرنگ کی ہے۔