وزیراعلیٰ خیبرپختونخوا محمود خان کی جانب سے پشاور کے مدرسے میں ہونے والے دھماکے کے متاثرین اورجاں بحق افراد کے اہل خانہ کے لیے امدادی پیکج کا اعلان کردیا گیا۔

تفصیلات کے مطابق وزیراعلیٰ خیبرپختوانخوا محمود خان کی جانب سے پشاور دھماکے کے متاثرین اور جاں بحق افراد کے لواحقین کے لیے امدادی پیکج کا اعلان کیا گیا ہے۔

 حکومتی امدادی پیکیج کے تحت شہدا کے اہل خانہ کیلئے 5لاکھ جبکہ زخمیوں کو 2لاکھ روپے دیے جائیں گے۔

وزیراعلی کے پی کا پشاور دھماکے کی مذمت کرتے ہوئے کہنا ہے کہ پشاور دھماکے کے متاثرین کے دکھ میں برابر کے شریک ہیں، امن عمل سبوتاژ کرنے نہیں دیں گے، واقعے میں ملوث دہشت گردوں کا جلد سراغ لگایا جائے گا۔

خیال رہے کہ آج صبح پشاور مدرسے میں دھماکے کے نتیجے میں 7 بچے شہید اور 72 زخمی ہوگئے، پولیس کا کہنا ہے کہ مدرسے میں آئی ای ڈی دھماکا ہوا ، دھماکے کے زخمیوں میں زیادہ ترتعداد بچوں کی ہے۔

پشاور کے علاقے دیرکالونی میں مدرسے میں صبح آٹھ بجے کے قریب جب بچے تعلیم حاصل کرنے میں مصروف تھے اور معلم نے مائیک پر درس قرآن کا آغاز ہی کیا تھا کہ اچانک زور دار دھماکے ہوا، ہر طرف ہولناک آگ لگ گئی اور زخمیوں کی چیخ وپکار سے درودیوار ہل گئے۔