چیئرمین پی پی پی بلاول بھٹو زرداری نے کہا ہے کہ پاکستان ڈیموکریٹک موومنٹ پاکستان میں عمران خان کے ظلم کے راج کا خاتمہ کرے گی۔

تفصیلات کے مطابق چیئرمین پی پی پی بلاول بھٹو زرداری کی سربراہی میں پی ڈی ایم کے تحت 18 اکتوبر کو ہونے والے پروگرام کی تیاریوں کے حوالے سے اہم اجلاس ہوا جس میں چیئرمین بلاول بھٹو زرداری نے پی ڈی ایم کے تحت ملک بھر میں احتجاجی تحریک کے حوالے سے جلسوں اور ریلیوں کا جائزہ لیا۔

اجلاس میں چیئرمین بلاول بھٹو زرداری نے 18 اکتوبر کو کراچی میں یوم شہدائے کارساز کے پروگرام کے انعقاد کے حوالے سے پی ڈی ایم میں شریک تمام جماعتوں جبکہ27 دسمبر کو لاڑکانہ میں شہید محترمہ بینظیر بھٹو کے یوم شہادت کے پروگرام کے انعقاد کے حوالے سے بھی پی ڈی ایم میں شریک تمام جماعتوں سے اظہار تشکر کیا۔

اس موقع پر چیئرمین بلاول بھٹو زرداری کا 30 نومبر کو ملتان میں پی پی پی کے یوم تاسیس کے پروگرام کے انعقاد کے حوالے سے بھی پی ڈی ایم میں شریک تمام جماعتوں سے اظہار تشکر کیا۔

بلاول ہاؤس میں ہونے والے اہم اجلاس کی صدارت کرتے ہوئے چیئرمین پی پی پی بلاول بھٹو زرداری نے کہا کہ پاکستان پیپلزپارٹی کی آل پارٹیز کانفرنس سے ملک میں ایک نئی عوامی مزاحمتی تحریک کی ابتداء ہوئی ہے

چیئرمین پی پی پی بلاول بھٹو زرداری نے مزید کہا کہ پاکستان ڈیموکریٹک موومنٹ عوام دشمن کٹھ پتلی سرکار کے تابوت میں آخری کیل ثابت ہوگی جبکہ پاکستان ڈیموکریٹک موومنٹ پاکستان میں عمران خان کے ظلم کے راج کا خاتمہ کرے گی۔

بلاول ہاؤس میں پی ڈی ایم کے تحت یوم شہدائے کارساز کی تیاریوں کے سلسلے میں ہونے والے اجلاس میں وزیراعلیٰ سندھ اور نثار کھوڑو ، وقار مہدی، عاجز دھامرا، سعید غنی، ناصر شاہ، اویس شاہ، جام خان شورو اور شرجیل میمن بھی شریک ہوئے جبکہ سینئر پی پی پی رہنما اور پی ڈی ایم کے سینئر نائب صدر راجہ پرویز اشرف نے بھی وڈیو لنک کے ذریعے خصوصی شرکت کی۔