سیکریٹری اطلاعات پیپلز پارٹی سینیٹر مولا بخش چانڈیو نے کہا ہے کہ سلیکٹڈ عمران خان اور پاکستان اب ایک ساتھ نہیں چل سکتے۔

تفصیلات کے مطابق سیکریٹری اطلاعات پیپلز پارٹی سینیٹر مولا بخش چانڈیو نے اپنے ایک بیان میں کہا کہ ملک مافیاز کے حوالے کر کے حکومت اپوزہشن کے پیچھے پڑ گئی ہے۔

سینیٹر مولابخش چانڈیو نے کہا کہ پی ڈی ایم نے حکومت کے ہوش اڑا دیے ہیں جبکہ حکومت نے سارے کام چھوڑ کر اپنے وزرا کو اپوزیشن پر حملوں پر مامور کر دیا ہے۔

سیکریٹری اطلاعات پیپلز پارٹی نے یہ بھی کہا کہ تمام وزرا اپنی اصل ذمہ داریاں چھوڑ کر سارا دن ٹی وی پر بیٹھے رہتے ہیں جبکہ حکومت کے اطوار بتا رہے ہیں کہ ان کے پائوں اکھڑ چکے ہیں۔

سینیٹر مولابخش چانڈیو کا کہنا تھا کہ چیئرمن بلاول بھٹو زرداری نے جو بیانیہ دیا تھا اوہ قوم کی آواز بن چکا ہے جبکہ جو حکومت آٹے،چینی،پیٹرول مافیا کے سامنے گھٹنے ٹیک دے وہ عوام کا سامنا نہیں کر سکے گی۔

اپنے بیان میں سیکریٹری اطلاعات پیپلز پارٹی سینیٹر مولابخش چانڈیو کا مزید کہنا تھا کہ بہت جلد یہ سب بھاگ جائیں گے اور گیڈر بھبھکیاں لگانے والے ترجمان بھی نہیں رہیں گے۔