وزیراعظم عمران خان نے کہا ہے کہ پاکستان اور تاجکستان علاقائی امن ، خوشحالی کے لئے کام کرتے رہیں گے۔

تفصیلات کے مطابق وزیراعظم عمران خان نے سماجی رابطے کی ویب سائٹ ٹویٹر پر اپنے ایک پیغام میں صدارتی انتخابات میں تاریخی کامیابی پر  تاجکستان کے صدر امام علی رحمن کو مبارکباد دی۔

صدر ایمومالی راحمون کو تاجکستان کے صدارتی انتخابات میں تاریخی فتح مبارک۔ پاکستان اور تاجکستان علاقائی امن، خوشحالی اور روابط میں باہم شراکت دار ہیں۔ اپنے ان برادرانہ تعلقات میں مزید پختگی کیلئے میں صدر راحمون کے ساتھ قریبی تعلقاتِ کار کا خواہاں ہوں۔

— Imran Khan (@ImranKhanPTI) October 12, 2020

اپنے پیغام میں وزیراعظم عمران خان نے مزید کہا کہ پاکستان اور تاجکستان علاقائی امن، خوشحالی اور روابط میں باہم شراکت دار ہیں اور اپنے ان برادرانہ تعلقات میں مزید پختگی کیلئے میں صدر راحمون کے ساتھ قریبی تعلقاتِ کار کا خواہاں ہوں۔

واضح رہے اس سے قبل تاجکستان کے صدر امام علی رحمان صدارتی انتخابات میں 90 فیصد سے زائد ووٹ لے کرایک بارپھرکامیاب ہو گئے تھے۔

 تاجکستان کے الیکشن کمیشن کے مطابق صدارتی انتخابات کے ابتدائی نتائج کے مطابق حق رائے دہی استعمال کرنے والے 90.9 فیصد عوام نے امام علی رحمان کے حق میں ووٹ دیا۔