وفاقی وزیر برائے نیشنل فوڈ سیکیورٹی اینڈ ریسرچ فخر امام نے کہا ہے کہ کشمیری عوام گذشتہ 7دہائیوں سے اپنے حق خود ارادیت کے لئے بے مثال قربانیاں دے رہے ہیں۔

تفصیلات کے مطابق وفاقی وزیر برائے نیشنل فوڈ سیکیورٹی اینڈ ریسرچ فخر امام نے اپنے ایک بیان میں کہا کہ بھارتی فوج مقبوضہ کشمیر میں بدترین مظالم کا ارتکاب کررہی ہے۔

فخر امام نے کہا کہ عالمی برادری نے پاکستان کے اس موقف کی تائید کی کہ کشمیر یکطرفہ مسئلہ نہیں ہے، بلاشبہ یہ پاکستان کی سفارتی فتح ہے۔

وفاقی وزیر برائے نیشنل فوڈ سیکیورٹی اینڈ ریسرچ نے یہ بھی کہا کہ جنوبی ایشیامیں امن و استحکام اقوام متحدہ کی قراردادوں کے چارٹر کے تحت مسئلہ کشمیر پر پاک بھارت مذاکرات کے بغیر ممکن نہیں ہے۔

فخر امام کا کہنا تھا کہ بھارتی فوج پیلٹ گنوں اور دیگر مہلک ہتھیاروں کے ذریعہ کشمیریوں کو اندھا کر رہی ہے جبکہ بھارتی حکومت خطے میں تسلط اور توسیع پسندی کے ایجنڈے پر عمل پیرا ہے۔

وفاقی وزیر برائے نیشنل فوڈ سیکیورٹی اینڈ ریسرچ فخر امام کا مزید کہنا تھا کہ پاکستان نے اقوام متحدہ کی قراردادوں کے مطابق مسئلہ کشمیر کو حل کرنے کے لئے مختلف بین الاقوامی فورمز پر کامیابی سے مسئلہ کشمیر کو اٹھایا ہے۔