پشاور کے علاقے دیرکالونی میں مدرسے میں دھماکا ہوا ہے جس کے نتیجے  میں 7طلباء جاں بحق ہوگئے جبکہ 50 سے زائد بچے زخمی ہوئے ہیں۔

لیڈی ریڈنگ اسپتال کی انتظامیہ نے بھی 7 ہلاکتوں کی تصدیق کی ہے۔ دھماکے میں متعدد زخمی جھلسے ہوئے ہیں اور انہیں ابتدائی طبی امداد دی جا رہی ہے۔ دو زخمیوں کو خیبر ٹیچنگ اسپتال بھی منتقل کیا گیا ہے۔

پولیس ذرائع کا کہناہے کہ 72 زخمیوں کو اسپتال منتقل کردیا گیا ہے، دھماکے میں مزید ہلاکتوں کا خدشہ بھی ظاہر کیا جا رہا ہے۔اسپتال ذرائع نے بتایا کہ بیشتر زخمی بچوں کی حالت تشویشناک ہے۔

پولیس ذرائع کا کہناہے کہ بم ناکارہ بنانے والی ٹیم بھی جائے وقوعہ پر پہنچ چکی ہے اور اطراف کے علاقے کو سیل کر دیا گیا ہے۔ غیر متعلقہ افراد کو جائے حادثہ پر جانے کی اجازت نہیں ہے۔

پولیس ذرائع کے مطابق جائے حادثہ سے ثبوت جمع کیے جا رہے ہیں جن کو فرانزک ٹیسٹ کیلئے بھجوایا جائے گا۔

پولیس ذرائع کے مطابق دھماکے کی نوعیت فی الحال معلوم نہیں ہوسکی تاہم ایک مشکوک شخص کو بھاری بیگ لے کر مدرسے میں داخل ہوتے دیکھا گیا تھا۔

ایس پی کینٹ پشاور کے مطابق ایک مشکوک شخص مدرسے میں صبح کے وقت بیگ چھوڑ گیا تھا اور فی الحال اس شخص کوئی سراغ نہیں مل سکا۔

پولیس ذرائع کے مطابق مشکوک شخص کی تلاش کیلئے آس پاس کے علاقوں میں ناکے لگا دیئے گئے ہیں اور سرچ آپریشن بھی کیا جا رہا ہے۔