وزیراعظم عمران خان نے کہا ہے کہ پاکستان میں رہنے والی اقلیتوں کو حقوق فراہم کرنا حکومت کی ترجیح ہے۔

تفصیلات کے مطابق وزیراعظم عمران خان نے اپنے ایک بیان میں کہا کہ بابا گرونانک دیو جی کے 551 ویں جنم دن پر سکھ برادری کو مبارکباد دیتا ہوں۔

عمران خان نے کہا کہ ننکانہ صاحب اور کرتارپورہ سکھ برادری کے مقدس مقامات ہیں اور یہ مقامات سکھ برادری کے لیے مسلمانوں کے مکہ مدینہ کی طرح ہیں جبکہ ہر مسلمان جانتا ہے مکہ مدینہ کی ان کے دل میں کیا اہمیت ہے۔

اپنے بیان میں وزیراعظم نے یہ بھی کہا کہ سکھ برادری کو یقین دلاتے ہیں ان کے مقدس مقامات کی حفاظت کریں گے اور ہم سکھ برادری کو ہر طرح کی سہولیات دیں گے۔

عمران خان نے یہ بھی کہا کہ حسن ابدال میں ریلوے اسٹیشن کو مکمل بحال کردیا یے اور ہم چاہتے ہیں سکھ برادری کو تمام سہولیات میسر آسکیں۔

وزیراعظم عمران خان نے مزید کہا کہ اقلیتوں کے مقدس مقامات کو محفوظ رکھنا حکومت کی پالیسی ہے جبکہ گوردوارہ، مندر، چرچ اور گندھارا تہذیب کی حفاظت کریں گے۔