وزیراعلیٰ پنجاب سردار عثمان بزدار نے کہا ہے کہ نوجوانوں پر سرمایہ کاری پاکستان کے مستقبل کو روشن بنائے گی۔

تفصیلات کے مطابق وزیراعلیٰ پنجاب سردار عثمان بزدار سے وزیراعظم کے معاون خصوصی برائے یوتھ افیئرز عثمان ڈار کی ملاقات ہوئی جس میں عثمان بزدار اور عثمان ڈار نے اپوزیشن جماعتوں کی جانب سے اداروں کے خلاف بیان بازی کی مذمت کی۔

ملاقات میں باہمی دلچسپی اور سیاسی امور پر بھی تبادلہ خیال کیا گیا جبکہ وزیراعظم کے ”کامیاب جوان پروگرام“ اور ٹائیگرز فورس کے امور پر بات چیت کی گئی۔

وزیراعظم کے معاون خصوصی برائے یوتھ افیئرز عثمان ڈار نے وزیراعلیٰ پنجاب کو کا میاب نوجوان پروگرام اور ٹائیگرز فورس کے امور سے آگاہ کیا۔

عثمان ڈار نے کہا کہ کامیاب نوجوان پروگرام کامیابی سے جاری ہے جبکہ ٹائیگرز فورس ہر میدان میں عوام کی خدمت کے لئے آگے آگے ہے۔

وزیراعظم کے معاون خصوصی برائے یوتھ افیئرز عثمان ڈار نے مزید کہا کہ وزیراعظم عمران خان جیسا شفاف اور ایماندار لیڈرپاکستان کی بقا کے لئے ناگزیر ہے جبکہ اپوزیشن رہنماؤں کا دامن کرپشن سے آلودہ ہے، اپوزیشن کا غیر فطری اتحاد بہت جلد منطقی انجام کو پہنچ جائے گا-

اس موقع پر وزیراعلیٰ پنجاب نے کہا کہ وزیراعظم عمران خان کے ویژن کے مطابق نوجوانوں کو با اختیار بنایا ہے جبکہ سابق دور میں حکمرانو ں نے نوجوانوں کو نظرانداز کیا۔

 سردار عثمان بزدار نے یہ بھی کہا کہ ماضی میں کسی حکومت نے نوجوانوں پر اتنی بڑی سرمایہ کاری نہیں کی جتنی تحریک انصاف کے مختصر دور میں ہوئی ہے۔

وزیراعلیٰ پنجاب کا کہنا تھا کہ ٹائیگر زفورس کے نو جوان خدمت کے جذبے سے سرشار ہیں اور عوام کی خدمت کیلئے میدان عمل میں مصروف ہیں جبکہ کامیاب جوان پروگرام سے روزگار میں اضافہ اورغربت میں کمی آئے گی۔۔

عثمان بزدار کا یہ بھی کہنا تھا کہ اپوزیشن کا شرانگیز بیانیہ بری طرح پٹ چکا ہے جبکہ ملکی وقار کے منافی رویے کی وجہ سے اپوزیشن اتحاد کا شیرازہ بکھر رہا ہے۔

وزیراعلیٰ پنجاب نے کہا کہ اپوزیشن کے پاس کوئی پروگرام ہے نہ ایجنڈا بلکہ یہ پاکستان کو کمزور کرنے کی مذموم کوششوں میں مصروف ہیں۔

عثمان بزدار نے یہ بھی کہا کہ وزیراعظم عمران خان کے ہوتے ہوئے کوئی پاکستان کی طرف میلی آنکھ سے نہیں دیکھ سکتا جبکہ اداروں کے خلاف باتیں کرنے والوں کو پہلے بھی ناکامی کا سامنا کرنا پڑا ہے اور آئندہ بھی یہ عناصر ناکام رہیں گے۔

وزیراعلیٰ پنجاب سردار عثمان بزدار نے مزید کہا کہ پاکستان کو آگے لے جانے کیلئے چوروں اور لٹیروں کا احتساب ضروری ہے جبکہ  وزیراعظم عمران خان 22 کروڑ عوام کے دل کی آواز ہیں اور اپوزیشن جو مرضی کر لے، لوٹ مار کا حساب دینا ہی پڑے گا۔