ممتاز عالم دین اور تحریک لبیک کے سربراہ علامہ خادم حسین رضوی کی مینار پاکستان پر نماز جنازہ ادا کردی گئی۔

لاہور میں علامہ خادم حسین رضوی کی نماز جنازہ  میں سیکیورٹی کے سخت انتظامات کیے گئے تھے۔اس موقع پر 10 ہزار سے زائد سیکیورٹی اہلکار تعینات تھے۔ اس موقع پر ڈولفن سکواڈ،پولیس ریسپانس یونٹ،ایلیٹ فورس، اے آر ایف،ایس پی یو اور سادہ لباس میں جوان نے بھی ڈیوٹی سرانجام دی۔

تحریک لبیک کے مطابق جنازے میں 10 لاکھ سے زیادہ لوگ شریک تھے جبکہ حکومتی اداروں اور میڈیارپورٹس کے مطابق 5 لاکھ کے قریب لوگوں نے نمازجنازہ میں شرکت کی۔

ڈولفن سکواڈ نے جنازے کے روٹ،گریٹر اقبال پارک اور گرد و نواح میں موثر پٹرولنگ  کی۔خادم رضوی  کی نماز جنازہ ان کے استاد نے پڑھائی۔

تحریک لبیک پاکستان کے سربراہ علامہ خادم حسین رضوی جمعرات کو قضائے الہیٰ سے انتقال کر گئے تھے۔

ذرائع کے مطابق علامہ خادم حسین رضوی بخار میں مبتلا تھے۔ اطلاعات کے مطابق طبعیت خراب ہونے پر علامہ خادم حسین رضوی کو شیخ زید اسپتال لے جایا گیا جہاں وہ  جانبر نہ ہوسکے۔