امریکا کی جانب سے افغانستان اور عراق سے امریکی فوجیوں کے مزید انخلا کا فیصلہ کر لیا گیا ہے۔

خبر رساں ایجنسی کا کہنا ہے کہ پینٹاگون نے فوجی  کمانڈروں کو افغانستان اور عراق سے 2 ہزار 500 فوجیوں کی واپسی کے لیے تیار رہنے کا حکم دے دیا ہے۔

اس سلسلے میں 2 ہزار فوجی افغانستان اور 500 عراق سے واپس بلائے جائیں گے، 15 جنوری تک فوج میں کمی مکمل کرلی جائے گی تاہم فوج واپس بلانے کا حتمی فیصلہ وائٹ ہاوَس کرے گا اور رواں ہفتے کے آخر تک فوجیوں کی واپسی کے لیے ایگزیکٹو آرڈر جاری کیا جائے گا۔

گزشتہ ماہ امریکی فوج کے چیئرمین جوائنٹ چیف آف اسٹاف جنرل مارک ملے نے کہا تھا کہ افغانستان سے امریکی فوجیوں کا انخلا اب بھی مشروط ہے۔

خیال رہے کہ اس وقت افغانستان میں 4 ہزار 500 اور عراق میں 3 ہزار امریکی فوجی اہلکار تعینات ہیں۔