سابق وزیرِاعظم اور مسلم لیگ ن کے قائد نواز شریف اور ن لیگ کے صدر شہباز شریف کی والدہ بیگم شمیم اختر کی میت لندن سے لاہور پہنچا دی گئی ہے۔

تفصیلات کے مطابق شہباز شریف اور حمزہ شہباز نے لاہور ایئر پورٹ پر بیگم شمیم اختر کی میت وصول کی، نواز شریف اور شہباز شریف کی ہمشیرہ کوثر بیگم بھی میت کے ساتھ لاہور پہنچی ہیں۔

بیگم شمیم اختر کی میت تدفین کےلیے جاتی امراء پہنچا دی گئی، اُن کی نمازِ جنازہ دوپہر ڈیڑھ بجے شریف میڈیکل کمپلیکس میں ادا کی جائے گی۔

شہباز شریف، شریف میڈیکل کمپلیکس سے جاتی امراء رہائشگاہ پہنچ گئے ہیں۔

خیال رہے کہ حکومتِ پنجاب نے شہباز شریف اور حمزہ شہباز کو 5 روز کے لیے پیرول پر رہا کیا ہے۔

واضح رہے کہ بیگم شمیم اختر کی نمازِ جنازہ گزشت روز لندن کے ریجنٹ پارک کی مسجد میں بھی ادا کی گئی تھی جس میں نواز شریف، حسین نواز، حسن نواز، اسحاق ڈار، اُن کے بیٹے علی ڈار اور قریبی رشتہ داروں نے شرکت کی تھی۔