ملک میں مہلک وبا کورونا وائرس کےسبب آج مزید 105 افراد جاں بحق ہوگئے جس کے بعد اموات کی کل تعداد 9 ہزار 10 تک پہنچ چکی ہے۔

نیشنل کمانڈ اینڈ آپریشن سینٹر (این سی او سی) کے مطابق گزشتہ 5 ماہ کے دوران آج سب سے زیادہ اموات ریکارڈ ہوئیں۔ پاکستان میں 2 ہزار 731 نئے کیسز رپورٹ ہوئے اور مجموعی تعداد 4 لاکھ 45 ہزار 977 ہو گئی ہے۔

اس وقت ملک میں عالمی وبا کے 3 لاکھ 88 ہزار 598 مریض صحتیاب ہو چکے اور 48 ہزار 369 زیر علاج ہیں۔

عالمی وبا  کے سبب سب سے زیادہ اموات پنجاب میں ہوئی ہیں جہاں 3 ہزار 452 افراد جان کی بازی ہار چکے ہیں جبکہ سندھ میں 3 ہزار 222، خیبر پختونخوا میں ایک ہزار 489، اسلام آباد میں 379، گلگت بلتستان میں 99، بلوچستان میں 176 اور آزاد کشمیر میں 193 افراد جان کی بازی ہار چکے ہیں۔

اسلام آباد میں کورونا کیسزکی تعداد 35 ہزار 203، خیبر پختونخوا میں 53 ہزار 253، سندھ میں ایک لاکھ 98 ہزار 482، پنجاب میں ایک لاکھ 28 ہزار 673، بلوچستان میں 17 ہزار 796، آزاد کشمیر میں 7 ہزار 771 اور گلگت بلتستان میں 4 ہزار 799 افراد کورونا سے متاثر ہوچکے ہیں۔