آنجہانی پوپ سنگر مائیکل جیکسن کی موت کے 11 سال بعد ان کی کیلی فورنیا نیور لینڈ رینچ جائیداد ابتدائی تخمینے کے باوجود کوڑی کے دام فروخت کر دی گئی۔

تفصیلات کے مطابق دنیا بھر میں کنگ آف پوپ کے نام سے  مانے جانے والے گلوکار مائیکل جیکسن کی جائیداد 22 ملین ڈالر میں فروخت کی گئی، جائیداد کو ایک چھوٹے بچے سے جنسی استحصال کے الزام اور مقدمے کی سماعت کے بعد سیل کر دیا گیا تھا۔

مائیکل جیکسن کی یہ جائیداد کسی اورنے نہیں بلکہ ان ہی کے سابق دوست اور  ارب پتی سرمایہ کار رون برکل نے خریدی جو کہ 1100 ہیکٹر (2700 ایکڑ) پر مشتمل ہے۔

امریکی اخبار وال اسٹریٹ جرنل کے مطابق اس جائیداد کو 22 ملین ڈالر میں فروخت کیاگیا۔

2015 میں سائیکامور ویلی رینچ کی قیمت 100 ملین ڈالر جبکہ 2017 میں 67 ملین ڈالر مقرر کی گئی تھی۔

مائیکل جیکسن نے لاس اولیوس میں یہ پراپرٹی 1988 میں 19.5 ملین ڈالر میں خریدی تھی، مالی مسائل کے بعد گلوکار نے اس جائیداد کو کالونی کیپیٹل ایل ایل سی (جائیداد کے حوالے سے قرض لینے والے ادارے ) کے حوالے کر دیا تھا۔