وفاقی حکومت کی جانب سے یکم فروری سے 900 صنعتوں کو گیس کی سپلائی بند کرنے کی منظوری دے دی گئی ہے۔

تفصیلات کے مطابق یکم مارچ سے ایکسپورٹ انڈسٹری کے پاور پلانٹس کو بھی گیس نہیں ملے گی۔

اس سلسلے میں اسد عمر کی سربراہی میں کابینہ کمیٹی برائے توانائی کا اجلاس ہوا جس میں یکم فروری سے 900 صنعتوں اور یکم مارچ سے ایکسپورٹ انڈسٹری کے پاور پلانٹس کو گیس کی سپلائی بند کرنے کا فیصلہ کیا گیا ہے۔

ذرائع کا کہناہے کہ اجلاس میں صنعتوں میں نصب کیپٹو پاور پلانٹس کو گیس فراہم کرنے پر مستقبل پابندی عائد کر دی گئی ہے۔

اجلاس میں کہا گیا کہ دستیاب اضافی بجلی کے باوجود صنعتی مالکان بجلی خریدنے پر تیار نہیں، دو برس میں گیس کی پیداوار 400ایم ایم سی ایف ڈی کم ہوچکی ہے۔ صنعتوں کو گیس کے بجائے نیشنل گرڈ سے بجلی فراہم کی جائےگی ۔

خیال رہے کہ اس وقت ملک بھر میں 1211 صنعتیں بجلی کی پیداوار کے لیے گیس کا استعمال کررہی ہیں۔