وزیر جیل خانہ جات پنجاب فیاض الحسن چوہان نے کہا ہے کہ پی ڈی ایم کے اتحاد کا شیرازہ بکھر چکا، بس اعلان ہونا باقی ہے۔

تفصیلات کے مطابق وزیر جیل خانہ جات پنجاب فیاض الحسن چوہان نے اپنے ایک بیان میں کہا کہ وزیر اعظم عمران خان نے پی ڈی ایم جماعتوں کی کرپشن کی دم پر پاؤں رکھا ہے۔

وزیر جیل خانہ جات پنجاب نے کہا کہ تمام اپوزیشن جماعتیں کرونا کی پہلی اور دوسری لہر کے دوران ڈرائنگ روم سیاست کرتی رہیں۔

 فیاض الحسن چوہان نے یہ بھی کہا کہ کورونا کے خلاف مل کر لڑنے کی حکومتی دعوت سے اپوزیشن کے کان پر جوں تک نہ رینگی جبکہ انکی کرپشن پر ہاتھ ڈالا تو انہیں عوام کا دکھ اور جمہوریت کو خطرات نظر آنا شروع ہوگئے۔

وزیر جیل خانہ جات پنجاب فیاض الحسن چوہان نے مزید کہا کہ عوام کا دکھ پیش نظر ہوتا تو پی ڈی ایم گلگت بلتستان الیکشن میں ایک دوسرے کے خلاف نہ چلتی،اپوزیشن کی بلبلاہٹ اور چیخ و پکار انکی عشروں کی کرپشن بے نقاب ہونے کا واضح ثبوت ہے۔