کراچی کے علاقے بوٹ بیسن میں دوہرے قتل کا معاملہ، گزشتہ روز جاں بحق ہونے والی انیلا عرف عینی کا شوہر اہلخانہ کے ہمراہ لاش وصول کرنے چھیپا سرد خانے پہنچ گیا۔

مقتولہ انیلا کے شوہر الطاف کا کہناہے کہ میں اسنوکر کلب میں کام کرتا ہوں، انیلا کی موت کا میڈیا کے ذریعے معلوم ہوا کہ اس کو گولی لگی۔

الطاف عرف طوفان خان کا پولیس کو بیان دیتے ہوئے مزید کہناتھا کہ میری کسی سے کوئی ذاتی دشمنی نہیں، عدنان نامی لڑکے سے ہمارا کوئی تعلق نہیں۔

مقتولہ کے شوہر کا کہناتھا کہ بیوی گھر سے دوائی لانے کا کہہ کر گئی تھی اور پھر اس کی موت کی خبرملی۔

اہلخانہ کا کہناہے کہ مقتولہ عینی کی تدفین سرگودھا میں کی جائے گی۔

خیال رہے کہ گزشہ رات کراچی کے علاقے بوٹ بیسن میں گاڑی پر نامعلوم افراد کی فائرنگ سے دو افراد جاں بحق ہوگئے تھے جس میں انیلا بھی شامل تھی۔

پولیس کے مطابق جائے وقوعہ سے30 بور پستول کے 5 خول ملے تھے۔ اس کے علاوہ پولیس نے علاقے کے اطراف سے سی سی ٹی وی فوٹیج بھی حاصل کرلی تھی۔