کےٹو پر سرچ آپریشن :جدید کیمروں کی مدد سے لاپتہ کوہ پیماؤں کی تلاش آج دوبارہ شروع کی جائے گی۔

تفصیلات کے مطابق کےٹو پر سرچ آپریشن میں لاپتہ کوہ پیماؤں کی تلاش آج دوبارہ شروع کی جائے گی ، سرچنگ اینڈ ریسکیو ٹیموں کو جدید کیمرے فراہم کر دیئے گئے، آج موسم میں بہتری کی امید ہے۔

علی سد پارہ سمیت 2 غیرملکی کوہ پیماؤں کی تلاش کے لیے زمینی راستے سے مقامی کوہ پیماؤں کی 6 رُکنی ٹیم تشکیل دی گئی ہے۔

ذرائع کے مطابق کےٹو پر ریسکیو اینڈ سرچ آپریشن پانچویں دن میں داخل ہوگیا ، لاپتہ کوہ پیماؤں کی تلاش آج دوبارہ شروع کی جائے گی، گزشتہ روزموسم کی خرابی کےباعث ریسکیوآپریشن معطل رہا۔

زمینی ریسکیو ٹیم فضائی مشن کی رہنمائی میں ڈیتھ زون تک پہنچنے کی کوشش کرے گی، زمینی ریسکیو ٹیم کا آج کمشنر آفس میں خصوصی اجلاس ہوگا۔

ذرائع کے مطابق آج موسم میں بہتری کی امید ہے، کے ٹو پر برفباری رک چکی ہے،موسم ابرآلوداورسرد ہے، برفیلی ہواؤں کادباؤ بدستور موجود ہے اور درجہ حرارت آج بھی منفی 60 ڈگری سینٹی گریڈتک گرچکا ہے۔

ریسکیو ذرائع کا کہنا ہے کہ محمدعلی سدپارہ اورٹیم جمعےکےدن سےلاپتہ ہیں۔