دنیا بھر میں پاکستان کا نام روشن کرنے والی زارا نعیم آج کل خبروں کی زینت بنی ہوئی ہیں۔

ورلڈ ریکارڈ ہولڈر زارانعیم نے ناصرف پاکستان بلکہ دنیا بھر میں اے سی سی اے جیسے مشکل ترین امتحان میں ٹاپ کر کے پوری قوم کا سر فخر سے بلند کیا ہے۔

ایسوسی ایشن آف چارٹرڈ سرٹیفائیڈ اکاؤنٹنٹس (اے سی سی اے) کے فنانشل رپورٹنگ کے امتحان میں نمایاں پوزیشن حاصل کرنے والی پاکستانی طالبہ زارا نعیم عالمی شہرت یافتہ امپائر علیم ڈار کی بھتیجی ہیں۔

زارا نعیم نے اپنے انسٹاگرام اکاؤنٹ پر علیم ڈار کی ایک مختصر ویڈیو شیئر کی جس میں انہوں نے بتایا کہ میری بھتیجی نے عالمی دنیا میں پاکستان کا نام روشن کیا۔

علیم ڈار نے اپنی ویڈیو میں کہا کہ اپنے ملک کیلئے ریکارڈ بنانا کسی کیلئے بھی بڑے اعزاز کی بات ہوتی ہے، اللہ نے مجھے بڑی عزت سے نوازا ہے اور امپائرنگ کے شعبے میں ملک کا نام روشن کر رہا ہوں۔

علیم ڈار نے ویڈیو پیغام میں مزید کہا کہ مجھے بڑی خوشی ہے کہ میری بھتیجی نے دنیا بھر میں اے سی سی اے کے امتحان میں نمایاں کامیابی حاصل کی ہے۔