خیبرپختونخوا حکومت نے بڑھتے ہوئے کورونا کیسز کے پیشِ نظر اسکولز بند کرنے کا فیصلہ کرلیا۔

تفصیلات کے مطابق خیبرپختونخوا حکومت نے 9 اضلاع میں اسکولز بند کرنے کا فیصلہ کیا ہے۔ ان اضلاع میں چارسدہ، مردان، صوابی، نوشہرہ، کوہاٹ، مالاکنڈ، سوات اور لوئر دیر شامل ہیں۔

وزیر اعلیٰ خیبر پختونخوا کی زیر صدارت ٹاسک فورس برائے انسداد کورونا کا اجلاس ہوا۔ جس میں کورونا مریضوں کے علاج معالجے کے لیے انتظامات پر بریفنگ دی گئی۔

اجلاس میں بریفنگ دیتے ہوئے بتایا گیا کہ جنوبی اضلاع میں کورونا کے مثبت کیسز کی شرح ایک فیصد ہے۔

وزیراعلیٰ خیبر پختونخوا محمود خان نے کہا کہ کورونا کے پھیلاؤ کو روکنے کے لئے ضروری اقدامات کر رہے ہیں، کورونا کی حالیہ لہر تشویشناک ہے، عوام احتیاطی تدابیر پر سختی سے عمل کریں۔