سینیٹ الیکشن کےلئے قومی اسمبلی میں پہلا ووٹ حکومتی جماعت پی ٹی آئی کے میاں شفیق آرائیں نے جبکہ دوسرا ووٹ وفاقی وزیر فیصل واوڈا نے کاسٹ کیا۔

تفصیلات کے مطابق ایوان بالا سینیٹ کی 37 نشستوں کے لیے انتخابی میدان سج گیا، قومی اور صوبائی اسمبلیوں میں ووٹنگ کا عمل کسی وقفے کے بغیر شام پانچ بجے تک جاری رہے گا۔

ذرائع کے مطابق چئیر مین پیپلز پارٹی بلاول بھٹو زرداری بھی ووٹ ڈالنے کیلئے پولنگ اسٹیشن میں موجود ہیں۔

الیکشن کمیشن نے ارکان قومی اسمبلی کیلئے ہدایت نامہ جاری کردیا ہے ، دو بیلٹ باکس پارلیمنٹ ہاؤس میں رکھے گئے ہیں، کسی کو بھی پولنگ اسٹیشن میں موبائل یا کیمرہ لے جانے کی اجازت نہیں ہے۔

ہدایت نامہ میں درج پابندی کا اطلاق ووٹر، امیدوار، پولنگ ایجنٹ سمیت سب پر ہوگا، ارکان کو بیلٹ پیپر حاصل کرنے کیلئے اسمبلی سے جاری شدہ کارڈ دکھانا ہوگا، عام نشست کیلئے بیلٹ پیپر سفید، خواتین کی نشست کیلئے گلابی بیلٹ پیپر جاری ہوگا، بیلٹ پیپر پر ووٹر کی شناخت کا نشان لگنے پر ووٹ مسترد تصور ہوگا۔

قومی اسمبلی ہال پولنگ اسٹیشن قرار دیا گیا ہے، قومی اسمبلی کے عملے کا ایوان میں داخلہ بند ہے، قومی اسمبلی ہال میں الیکشن کمیشن کا عملہ یا ارکان ووٹر داخل ہو سکتے ہیں، میڈیا کے بھی پریس گیلری میں فون لے جانے پر پابندی ہے۔