اپوزیشن لیڈرسندھ اسمبلی حلیم عادل شیخ کی رہائی آج روک دی گئی ہے۔

تفصیلات کے مطابق جیل ذرائع کا کہناہے کہ میرپورماتھیلو کی عدالت کی جانب سے جاری ریلیز آرڈر پر جج کی مہر نہیں ہے۔

جیل ذرائع کا کہناہے کہ کراچی کی انسداد دہشتگردی عدالت کے ریلیزآرڈر میں ایک سیکشن اضافی ہے جو ریمانڈ پیپر میں نہیں تھا، لہٰذا حلیم عادل شیخ کی رہائی آج کیلئے روک دی گئی ہے۔

اس سلسلے میں حلیم عادل شیخ کے وکلاء کا کہناہے کہ کل دونوں عدالتوں سے دوبارہ ریلیز آرڈر جاری کرنے کی درخواست کریں گے۔

خیال رہے کہ اس سے قبل کراچی کی انسداد دہشت گردی عدالت نے قائد حزب اختلاف سندھ کے ریلیز آرڈر جاری کیے تھے، حلیم عادل شیخ کے تمام کیسز میں ريليز آرڈر جاری ہوئے تھے۔

گزشتہ روز سندھ ہائی کورٹ نے 2،2 لاکھ روپے کے مچلکوں کے عوض دونوں کیسز میں حلیم عادل شیخ کی ضمانت منظور کی تھی۔

گزشتہ روز گھوٹکی کیس میں میرپور ماتھیلو کی عدالت نے بھی اپوزیشن لیڈر سندھ اسمبلی کی ضمانت منظور کی تھی۔