کیپٹن ریٹائرڈ محمد صفدر کا کہنا ہے کہ جو پی ڈی ایم کی ٹرین میں نہیں بیٹھے گا وہ پچھتائے گا۔

تفصیلات کے مطابق مسلم لیگ ن یوتھ ونگ کےصدر کیپٹن ریٹائرڈ صفدر نے لاہور میں یوتھ ونگ کنونشن کے انتظامات کا جائزہ لیا اور میڈیا سے گفتگو کرتے ہوئے کہاکہ نوجوان پی ڈی ایم کے دھرنے میں 3 ماہ بیٹھیں گے اور عید الاضحیٰ بھی ڈی چوک اسلام آباد میں منائیں گے، جو پی ڈی ایم کی ٹرین میں نہیں بیٹھے گا وہ پچھتائے گا۔

مسلم لیگ ن کے قائد نواز شریف کے داماد محمد صفدر نے کہاکہ مریم نواز انتقامی کارروائیوں سے گھبرانے والی نہیں، 26 مارچ کو نیب میں پیش ہوں گی۔

انہوں نے کہاکہ نیب سیاسی انتقام کا ادارہ ہے، مریم سے  ذاتی عناد کی بنیاد پر سیاسی انتقام لیا جا رہا ہے۔

ایک سوال کے جواب میں رہنما مسلم لیگ ن نے کہاکہ سیاستدانوں پر انڈے اور سیاہی پھینکنے کا کلچر اچھا نہیں ہے۔