اسلام آباد میں 3 تعلیمی اداروں میں 8 کورونا کیسز سامنے آگئے۔

تفصیلات کے مطابق وفاقی دارالحکومت میں کورونا کیسز رپورٹ ہونے پر اسلام آباد کے 3 تعلیمی ادارے بند کرنے کا فیصلہ کیا ، ڈی ایچ او نے ایک نجی اور دو سرکاری تعلیمی اداروں کو سیل کرنے کیلئے مراسلہ ڈی سی اسلام آباد کو بھیج دیا۔

ڈی ایچ او ڈاکٹر زعیم ضیا نے ڈپٹی کمشنر اسلام آباد کو مراسلہ جاری کرتے ہوئے کہا کہ بیکن ہاؤس میٹروپولیٹن کیمپس جی الیون تھری میں 3 کورونا کیسز سامنے آئے جبکہ آئی سی جی ایف سکس ٹو میں 2 کورونا کیسز سامنے آئے اور آئم ایم سی جی آئی نائن ون میں 3 کورونا کیسز سامنے آئے۔

ڈاکٹر زعیم ضیا نے یہ بھی کہا کہ کورونا سے متاثرہ 3 کالجز تا حکم ثانی بند کر دیئے جائیں کیونکہ ان تعلیمی اداروں میں کیسز سامنے آ چکے ہیں۔

ڈی ایچ او ڈاکٹر زعیم ضیا نے ڈپٹی کمشنر اسلام آباد کو مراسلے میں مثبت کیسز سے متاثرہ افراد کو فوری قرنطینہ کرنے کی ہدایت دی جبکہ تمام طالبات اور دیگر رابطوں کے کورونا ٹیسٹ کرانے کا حکم بھی دیا گیا۔