چیئرمین اورڈپٹی چئیرمین سینیٹ کا انتخاب کل ہوگا، اس سلسلے میں وزیراعظم عمران خان نے تحریک انصاف و اتحادی جماعتوں کے سینیٹرز کے اعزاز میں ظہرانے کا اہتمام کیا ہے۔

تفصیلات کے مطابق وزیراعظم کی جانب سے دئیے گئے اس ظہرانےمیں ڈپٹی چیئرمین سینیٹ کے نام پر مشاورت کی جائے گی۔

ذرائع کے مطابق 44 سینیٹرز ظہرانے کے لئے وزیراعظم ہاؤس پہنچ چکے ہیں ، صادق سنجرانی ،فیصل سبزواری ،ملک عامر ڈوگر ،  شاہ محمود قریشی ، اسد عمر ، شفقت محمود اور اسپیکر قومی اسمبلی اسد قیصر بھی وزیراعظم ہاؤس پہنچ گئے۔

ظہرانےمیں ڈپٹی چیئرمین سینیٹ کے نام پر مشاورت بھی کی جائے گی جبکہ وزیراعظم عمران خان نو منتخب سینیٹرز سے خطاب بھی کریں گے۔

یاد رہے گذشتہ روز وزیر اعظم نے اتحادی جماعتوں کے رہنماؤں سے ملاقات کی تھی ، ملاقات میں حکومتی اتحادی جماعتوں نے وزیر اعظم کو ڈپٹی چیئرمین کی نامزدگی کا اختیار دے دیا تھا۔