وفاقی وزیر ریلوے اعظم سواتی نے 26 مارچ سے پاکستان ریلویز کی پراپرٹی کو آؤٹ سورس کرنے کا باقائدہ اعلان کردیا ہے۔

اعظم سواتی کا اسلام آباد میں پریس کانفرنس کرتے ہوئے کہنا تھا کہ 26 مارچ سے راولپنڈی اور اسلام آباد اور یکم اپریل سے کراچی میں پاکستان ریلویز کی پراپرٹی کو آؤٹ سورس کرنے جارہے ہیں۔

انہوں نے کہا کہ ریلوے تباہی کی حالت سے گزرا ہے، اب اس ادارے کی بحالی کا کام شروع ہوچکا ہے۔

اعظم سواتی کا کہنا تھا کہ وزیراعظم کا ویژن ہے کہ ریلوے ترقی کرے، کرپشن، عدم صلاحیت اور مس منیجمنٹ نے ریلوے کو تباہ کیا، میں نے جو کام کیا اسکا سب کے سامنے جواب دہ ہوں۔

انہوں نے کہا کہ ریلوے کے سفر کو سہولیات سے آراستہ کرینگے، ریلوے کو کمانے کیلئے تین ماہ میں 30ارب کا ہدف دیا ہے۔

اعظم سواتی کا کہنا تھا کہ ڈویژن کے بڑے اسٹیشنز کو ایف ڈبلیو او کے ساتھ جدید بنایا جائےگا، آئل کمپنیاں ٹرک والوں کے ساتھ ملی ہوئی ہیں اور پاکستان ریلویز استعمال نہیں کر رہیں۔

وزیر ریلوے کا کہنا تھا کہ پاکستان ریلویز کا ادارہ درست سمت میں چل رہا ہے، آئندہ ایک ماہ میں ٹکٹوں کا نظام ڈیجیٹل ہوجائےگاجس سے فی ٹکٹ 8 روپے منافع ہوگا۔