پاکستانی راک اسٹار علی ظفرنے جیلوں میں قید خواتین کی قانونی مدد کرنے کا اعلان کیا ہے۔

تفصیلات کے مطابق علی ظفر نے ایک نجی ٹی وی کے پروگرام میں خواتین کو درپیش مسائل پرگفتگو کرتے ہوئےجیلوں میں قید خواتین کی مدد کرنے کا اعلان کیا۔

علی ظفر کا کہنا تھا کہ پاکستان میں انصاف حاصل کرنے کے نظام میں کچھ خامیاں ہیں جس وجہ سے کئی خواتین سالوں تک جیلوں میں رہتی ہیں۔

گلوکار کا کہنا تھا کہ اصولی طور پر تو جیلوں میں قید خواتین کی مدد ریاست کا کام ہے لیکن نظام میں خامیاں موجود ہیں جس کی وجہ سے یہ کام عام افراد کو کرنا پڑے گا۔

علی ظفر نے کہا کہ جب تک ریاست کا انصاف کا نظام درست نہیں ہوتا اُس وقت تک اُن افراد کو کردار ادا کرنا چاہیے جن کے پاس استطاعت ہے۔

اس موقع پر علی ظفر نے اعلان کیا کہ وہ ذاتی طور پر جیلوں میں قید ان خواتین کی قانونی مدد کریں گے جن پر کوئی الزام ثابت نہیں ہوا اور وہ کئی سال سے جیلوں میں قید ہیں۔

انہوں نے کہا کہ وہ قانون دانوں کو درخواست کریں گے کہ جیلوں میں کئی سال سے قید ان خواتین کو انصاف دلوایا جائے جن پر تاحال کوئی الزام ثابت نہیں ہوا۔

علی ظفر نے مزید کہا کہ آزادی ایک نعمت ہے اور کئی خواتین بے گناہ کئی سال سے قید کی زندگی گزار رہی ہیں۔