امریکی شہر انڈیاناپولس میں لاجسٹک کمپنی میں حملہ آور نے فائرنگ کرکے 8 افراد کی جان لے لی۔

خبر ایجنسی کے مطابق فائرنگ کا واقعہ معروف لاجسٹک اور سپلائی چین مینجمنٹ کمپنی فیڈیکس کے دفتر کی پارکنگ میں رات 10 بجے پیش آیا۔

امریکی پولیس کے مطابق حملہ آور نے فیڈیکس کے دفتر کے پارکنگ ایریا میں فائرنگ سے متعدد افراد کو شدید زخمی کردیا جس میں زخمیوں کی تاب نہ لاتے ہوئے 8 افراد ہلاک ہوگئے۔

امریکی پولیس کے مطابق فائرنگ کے واقعے کے بعد حملہ آور نے خود کو گولی مار کر خودکشی کرلی۔

واقعے کے بعد پولیس نے علاقے کو گھیرے میں لے لیا جبکہ امدادی ٹیموں نے موقع پر پہنچ کر زخمیوں کو طبی امداد کیلئے شہر کےمختلف اسپتالوں میں منتقل کردیا ہے۔

پولیس کا کہناہے کہ فائرنگ کی اصل وجہ تاحال معلوم نہ ہوسکی۔