پاکستان تحریک انصاف نے کراچی کے حلقے این اے 249 میں فوج کی تعیناتی کامطالبہ کردیا ہے۔

تفصیلات کے مطابق این اے 249 ضمنی انتخاب کے حوالے سے پی ٹی آئی ارکان الیکشن کمیشن کے دفترپہنچے ہیں اور حلقے میں فوج کی تعیناتی کا مطالبہ کرتے ہوئے درخواست دیدی ہے۔

پی ٹی آئی ارکان نے کہا کہ فوج،رینجرزکوپولنگ اسٹیشن کے اندراورباہرتعینات کیاجائے۔

 درخواست میں مزید کہاگیا ہے کہ پولنگ کادن بھی تبدیل کیاجائے۔اس حوالے سے تحریک انصاف کے رہنما خرم شیر زمان نے میڈیا سے گفتگو کرتے ہوئے کہا کہ آج الیکشن کمیشن کے دفتر آئے تھے،ہم الیکشن کمیشن کو پہلے بھی درخواستیں دے چکےہیں۔

الیکشن کمیشن کو پی ٹی آئی سے زیادہ تکلیف ہے۔خرم شیر زمان نے کہا کہ ہم نے کہا تھا کہ رمضان کے بعد الیکشن کرائیں، جمعرات کے بجائے اتوار کے روز ضمنی انتخاب کرایا جائے۔

انہوں نے کہا کہ شفاف انتخاب کرانے میں الیکشن کمیشن پہلے بھی ناکام ہوا ہے، 29 اپریل کے انتخاب میں قانون نافذ کرنے والے پولنگ اسٹیشن کے اندر اور باہر بھی موجود ہوں۔

خرم شیر زمان نے مزید کہا کہ ووٹرز کے ووٹ کی حفاظت ہونی چاہیے۔