انجمن تاجران کراچی نے ہفتہ وار چھٹی کاحکومتی فیصلہ مسترد کردیاہے۔

تفصیلات کے مطابق صدرانجمن تاجران کراچی جاوید شمس کا کہنا ہے کہ سندھ حکومت کی جانب سے مارکیٹوں کی ہفتہ اور اتوار کی بندش ہرگز قبول نہیں ہے۔

انہوں نے کہا کہ جمعہ اوراتوار کی جبری تعطیلات کے بعد بغیرمشاورت کے ہفتہ اور اتوارکی تعطیلات کا اعلان سمجھ سے بالاتر ہے۔

صدر انجمن تاجران کراچی نے کہا کہ سندھ حکومت این سی او سی کی آڑ میں تاجروں کا معاشی قتلِ عام کررہی ہے، بند کمروں میں کیے گئے فیصلے تاجروں کوسازش کے تحت مشتعل کرنے کی کوشش ہیں۔

صدر انجمن تاجران کراچی کا کہناتھا کہ سندھ حکومت کاروباری اور تجارتی مراکز کو ہفتے میں 6 روز کھولنے کا فوری اعلان کرے۔

انہوں نے کہا کہ 15 رمضان تک کاروباری اوقات رات 10 بجے تک اور 15 روزے کے بعد رات 2 بجے تک بڑھائے جائیں۔

صدر انجمن تاجران کراچی کا کہنا ہے کہ تصادم نہیں چاہتے، سندھ حکومت تاجروں کی مشکلات کو مدِنظر رکھ کر فیصلے کرے۔