وزیر اعظم عمران خان نے کہا ہے کہ موجودہ حکومت بلوچستان کی ترقی کو اپنی ترجیحات میں اولین درجہ دے رہی ہے۔

تفصیلات کے مطابق وزیر اعظم عمران خان سے بلوچستان کے سیاسی عمائدین کی ملاقات ہوئی جس میں بلوچستان کے گیس اور بجلی کے مسائل کے حل کو ترجیحی بنیادوں پر حل کرنے پر گفتگو کی گئی۔

ملاقات میں وفاقی وزراء زبیدہ جلال، اسد عمر، مراد سعید، معاونِ خصوصی عثمان ڈار ، وزیراعلیٰ بلوچستان جام کمال ، سردار یار محمد رند اور دیگر لیڈران نے شرکت کی۔

اس موقع پر وزیراعظم عمران خان نے کہا کہ تاریخ میں پہلی دفعہ موجودہ حکومت بلوچستان کی ترقی کو اپنی ترجیحات میں اولین درجہ دے رہی ہے۔

عمران خان نے یہ بھی کہا کہ بلوچستان میں شروع ہونے والے منصوبوں میں مقامی نوجوانوں کو روزگار کے مواقع دیئے جا رہے ہیں۔

 وزیراعظم عمران خان نے مزید کہا کہ گزشتہ حکومتوں کی بلوچستان کو نظر انداز کرنے کی پالیسی کی وجہ سے یہاں کے لوگوں کو انکے حقوق نہیں ملے لیکن اب بلوچستان میں ترقی کے نئے دور کا آغاز ہوچکا ہے۔