مسلم لیگی رہنما احسن اقبال کا کہنا ہےکہ حکومت کی نالائقی اور غفلت کی وجہ سے ملک میں بحران ہے۔

تفصیلات کے مطابق مسلم لیگ ن کے رہنما احسن اقبال نے میڈیا سے گفتگو کرتے ہوئے کہاکہ  ملک بحران سے دوچار ہے اور حکومت کو نواز شریف کی جائیدادوں کی پڑی ہے، وزیراعظم غیرذمہ داری کا مظاہرہ کر رہے ہیں۔

احسن اقبال نے کہا کہ ملک کے اندر بحرانی صورتحال ہے، بیرونی سرمایہ کاری کہاں ہے؟

انہوں نے کہاکہ وزیراعظم نے گزشتہ روز جوتقریرکی وہ سب کے سامنے ہے، عمران خان کا خطاب طعنوں اور نفرت پر مبنی تھا۔

ن لیگی رہنما نے کہا کہ عمران خان کے خطاب میں پیش کردہ ترقی کے اعدادوشمار حقائق کے منافی ہیں، دنیا کہہ رہی ہے کہ پاکستان کی معیشت گر رہی ہے۔

احسن اقبال نے کہاکہ بحران کو گفتگو سے حل کیا جائے تاکہ حالات نہ بگڑیں، حکومت کی نااہلی اورغفلت کی وجہ سے ملک میں بڑا بحران ہے۔

انہوں نے مزید کہا کہ امید ہے تمام فریقین گفت و شنید سے اس مسئلے کا حل نکالیں گے، حکومت نے غیر سنجیدہ رویہ روا رکھا اور کالعدم تنظیم سے معاہدہ کرلیا۔