مولانا فضل الرحمان کا کہناہےکہ فلسطینی عوام کے ساتھ مکمل طور پر اظہار یکجہتی کرتے ہیں۔

تفصیلات کے مطابق جے یو آئی (ف) اور پاکستان ڈیمو کریٹک موومنٹ کے سربراہ  مولانا فضل الرحمان نے فلسطینی عوام کے نام پیغام جاری کیا ہے۔

مولانا فضل الرحمان کا کہنا ہےکہ پاکستانی عوام اپنے مظلوم بھائیوں کے ساتھ شانہ بشانہ کھڑی ہے، اسرائیل نے رمضان المبارک کی 27 ویں شب سمیت بابرکت ایام میں انسانیت سوز مظالم ڈھائے ہیں۔

انہوں نے کہاکہ بیت المقدس پر اس وقت صیہونی درندوں نے حملہ کیا جب مسلمان نماز میں مشغول تھے۔ بچوں، بزرگوں، جوانوں اور خواتین کی قربانیوں کے باوجود فلسطینی عوام نے بیت المقدس سے اپنا رستہ برقرار رکھا جس پر خراج تحسین پیش کرتے ہیں۔

ان کا کہنا ہےکہ اسرائیلی جارحیت اور ظلم پر خاموش رہنے والے مسلم ممالک دراصل اسرائیل کے ظلم کے حامی بن رہے ہیں ،مسلم امہ کیوں خاموش ہے، او آئی سی کی خاموشی کیوں ہے؟ کیوں مظلوم مسلمانوں کی آواز نہیں سنی جارہی، اقوام متحدہ نے کیوں آنکھیں بند کر رکھی ہیں؟ انسانی حقوق کے ادارے کیوں خاموش ہیں؟

یہ تمام عالمی ادارے انسانی حقوق کے پاسبان نہیں یہ انسانی حقوق کو بیچنے والے ادارے بن چکے ہیں۔

مولانا فضل الرحمان کا ملک گیر مظاہروں کا اعلان

جے یو آئی (ف) اور پاکستان ڈیمو کریٹک موومنٹ ( پی ڈی ایم) کے سربراہ مولانا فضل الرحمان نےعید کے بعد فلسطینی عوام سے اظہار یکجہتی کے لیے ملک گیر مظاہروں کا اعلان کردیا ہے۔

انہوں نے نماز عید و اجتماعات جمعہ میں بھی بھرپور آواز اٹھانے کا اعلان کیا ہے۔

مولانا فضل الرحمان نے اپیل کی ہےکہ  پوری پاکستانی قوم اور امہ عید و نماز جمعہ کے اجتماعات میں فلسطینی عوام سے اظہار یکجہتی کرتے ہوئے صدائے احتجاج بلند کریں۔