عالمی وباء کورونا وائرس سے متعلق طبی تحقیق میں نیا انکشاف سامنے آگیا ہے۔

یونیورسٹی آف ٹورنٹو ڈیلا لانا اسکول آف پبلک ہیلتھ کی تحقیق میں یہ بات سامنے آئی ہے کہ کارڈیو ریسپیرٹری (دل اور تنفس کے نظام) میں فٹنس کورونا وائرس سے بچاسکتی ہے۔

یہ بات کینیڈا میں ہونے والی ایک طبی تحقیق میں سامنے آئی ہے جس میں یہ عندیہ دیا گیا ہے کہ جسمانی طور پر فٹ افراد میں کورونا سے موت کا خطرہ کم ہوجاتا ہے۔

تحقیق کاروں نے بتایا کہ ایک سروے کے دوران یہ بات سامنے آئی کہ ایسے تمام افراد جو جسمانی طور پر زیادہ متحرک تھے ہیں، انہیں کورونا سے کوئی نقصان نہیں پہنچا۔

طبی جریدے جرنل پلوس ون میں شائع تحقیق کے دوران یوکے بائیو بینک اسٹڈی کے ڈیٹا کا تجزیہ کیا گیا جس میں 2690 افراد کو شامل کیا گیا تھا۔

تحقیق میں اس بات پر توجہ دی گئی کہ کووڈ سے متاثر ہونے اور موت کا خطرہ جسمانی فٹنس سے کس حد تک کم ہوسکتا ہے۔

محققین کا کہنا ہے کہ یہ بات سامنے آئی کہ جسمانی فٹنس اور کورونا سے متاثر ہونے کے خطرے کے درمیان کوئی نمایاں تعلق نہیں ہے تاہم موت کے خطرے میں کمی واضح تھی۔

اس تحقیق میں شامل افراد کی عمریں 49 سے 80 سال کے درمیان تھیں اور ڈیٹا میں ان افراد کی فٹنس کی درجہ بندی بھی کی گئی تھی۔

محققین نے دریافت کیا کہ ہلکی پھلکی ورزش سے بھی کورونا سے موت کے خطرے میں کمی دیکھنے میں آئی ہے۔

ان کا کہنا تھا کہ عمر کے ساتھ جسمانی سرگرمیاں کم ہوجاتی ہیں، تاہم اگر اپنی عمر کے گروپ کے مطابق فٹ ہیں تو آپ کو اس کورونا سے لڑنے میں مدد مل سکتی ہے۔