وزیراعظم عمران خان نے کہا ہے کہ اسلام نے ہی کمزور طبقے کو طاقتور بنایا ہے اور خواتین کو حقوق مہیا کیے ہیں۔

تفصیلات کے مطابق وزیر اعظم عمران خان نے چیئرمین ڈاکٹر قبلہ ایاز سمیت دیگر کونسل ممبران سے ملاقات کی ہے۔

وزیراعظم نے کہا کہ نظریاتی کونسل کا کردار ریاست مدینہ میں اہمیت کا حامل ہے۔

انہوں نے یہ بھی کہا کہ ریاست مدینہ کے دو سنہرے اصول ہیں ،انصاف اور عوامی فلاح ہماری ترقی کا ضامن بن سکتے ہیں۔

عمران خان کا کہنا تھا کہ مغرب نے انہی اصولوں کو اپنا کر ترقی کی ہے جبکہ مغرب میں کوئی قانون سے بالاتر نہیں اور انصاف کا ہی بول بالا ہے۔

وزیراعظم نے کہا کہ اسلامی فلاحی ریاست بنانے کے بارے میں پہلے کبھی کسی لیڈر نے نہیں سوچا۔

انہوں نے یہ بھی کہا کہ سیاست صرف اس لئے شروع کی کہ ریاست مدینہ کے اصولوں کو لاگو کر سکوں۔

عمران خان کا کہنا تھا کہ اسلام کے رہنما اصولوں اور سنت نبوی پرعمل کر کے ترقی کر سکتے ہیں۔

وزیراعظم نے کہا کہ مغربی اقدار ہم سے مختلف ہیں۔

انہوں نے یہ بھی کہا کہ ہماری نوجوان نسل کو اس ضمن میں رہنمائی درکار ہے۔

وزیراعظم عمران خان کا مزید کہنا تھا کہ اسلامی نظریاتی کونسل نوجوانوں کی اصلاح میں مددگارہو سکتی ہے۔