طبی ماہرین کے مطابق سیاہ رنگ کی کلونجی کی یہ اہم خاصیت ہے کہ یہ گرم اور سرد دونوں طرح کے امراض میں مفید ہے۔

کلونجی کی اپنی تاثیرگرم ہے اور سردی سے ہونے والے تمام امراض میں مفید ہے۔

سنت نبوی صلی اللہ علیہ و آلہ وسلم میں بھی اس کے استعمال کے فوائد ملتے ہیں۔

کلونجی کو سرکے کے ساتھ ملا کر کھانے سے پیٹ کے کیڑے مر جاتے ہیں۔

سردیوں کے موسم میں جب  زکام ہو جائے تو ایسی صورت میں کلونجی کو بھون کر باریک پیس لیں اور کپڑے میں باندھ کر پوٹلی بنا کر باربار سونگھنے سے زکام دور ہوجاتا ہے۔

 مختلف کھانوں کا ذائقہ بڑھانے کے لیے بھی کلونجی کا استعمال کیا جاتا ہے۔

 مختلف امراض جیسے یرقان، ہاضمے کے مسائل ، دمہ، ہڈیوں کی کمزوری اور تیز بخارکے علاج کے لیے کلونجی کا استعمال ہوتا ہے۔

اگر چھینکیں آرہی ہوں تو کلونجی بھون کر باریک پیس کر زیتون کے تیل میں ملا کر اس کے تین چار قطرے ناک میں ٹپکانے سے چھینکیں رک جاتی ہیں۔

کلونجی کا ناشتے میں استعمال اور فوائد

کلونجی روزانہ ناشتے میں استعمال کر نے کے بے شمار فوائد ہیں جنہیں جاننے کے بعد آپ اس کا استعمال ضرور کرینگے۔

کلونجی اگر روزانہ ناشتے میں استعمال کی جائے تواس کے حیرت انگیز مفید نتائج سامنے آتے ہیں۔

 ایک کپ کلونجی کے بیج، دو چمچ میتھی کے بیج اورایک چمچ جنگلی نیاز بو لے کر ان تمام اجزاء کو پیس لیں۔

ہر صبح ناشتے میں ایک کھانے کا چمچ یہ سفوف شہد میں حل کریں اور کھا لیں۔

اس کے بعد ایک گلاس دودھ ضرور پئیں جبکہ پھلوں کا استعمال بھی ضرورکریں اور صرف چھ ہفتے میں حیرت انگیزنتائج دیکھیں۔

چہرے کی رنگت میں نکھار پیدا کرنے کے لیے کلونجی کو باریک پیس کر زیتون کے تیل  میں ملا کر چہرے پر لیپ کرنے سے فائدہ ہوتا ہے۔

 کلونجی کو باریک پیس کر سرکے میں ملا کر سونے سے قبل چہرے پرلگا لیں  اور صبح اٹھ کر چہرے کو دھو لیں۔  چند دنوں میں ہی اچھے اثرات سامنے آئیں گے۔

کلونجی کا باقاعدگی سے استعمال کیا جائے تو یہ جسم میں کولیسٹرول کو ختم کرکے بلڈ پریشر کو بھی کنٹرول کرتا ہے۔