کورونا پروٹوکول کی خلاف ورزی پر نسیم شاہ کو پاکستان سپر لیگ سے نکال دیا گیا ہے۔

پاکستان کرکٹ بورڈ (پی سی بی) کی جانب سے جاری کردہ اعلامیے کے مطابق کوئٹہ گلیڈی ایٹرز کے فاسٹ باؤلر نسیم شاہ کو ہوٹل چھوڑ کر گھر جانے کا کہہ دیا ہے۔

اعلامیے میں کہا گیا کہ ناقابل قبول پی سی آر ٹیسٹ کی رپورٹ جمع کروانے کی وجہ سے نسیم شاہ سپر لیگ سے باہر ہوئے ہیں اس لئے نسیم شاہ 26 مئی کو ابوظہبی روانہ نہیں ہوں سکیں گے، لہٰذا وہ ٹورنامنٹ سے باہر ہوگئے ہیں۔

ذرائع کے مطابق کوویڈ 19 پروٹوکولز کے تحت تمام افراد کو 48 گھنٹے قبل دئیے گئے اپنے کوویڈ 19 ٹیسٹ کی رپورٹ جمع کروانا تھی جبکہ نسیم شاہ نے اپنے 18 مئی کو کیے گئے کوویڈ 19 ٹیسٹ کی رپورٹ جمع کروائی تھی، پرانی رپورٹ جمع کروانے پر انہیں  ہوٹل کی علیحدہ منزل پر آئسولیشن میں رکھا گیا۔

پاکستان کرکٹ بورڈ (پی سی بی) کے مطابق تین رکنی انڈیپنڈنٹ میڈیکل ایڈوائزری پینل برائے پی ایس ایل  کی سفارشات پر انہیں ریلیز کرنے کا فیصلہ کیا گیا ہے