گورنر سندھ عمران اسماعیل نے کہا ہے کہ پاکستان ہالینڈ کے ساتھ اپنے تعلقات کو مستحکم رکھنا چاہتا ہے۔

تفصیلات کے مطابق گورنر سندھ عمران اسماعیل سے پاکستان میں تعینات ہالینڈ کے سفیر ولیم واؤٹر پلمپ کی گورنر ہاؤس میں ملاقات ہوئی جس میں باہمی دلچسپی کے امور اور دو طرفہ تعاون کو مزید فروغ دینے کے مواقع پر تبادلہ خیال کیا گیا۔

ملاقات میں گورنر سندھ نے کہا کہ صوبہ باالخصوص شہر کراچی میں معاشی تعاون کو بڑھانے ، نئے منصوبوں کو نافذ کرنے اور نئی سرمایہ کاری کرنے کی گنجائش موجود ہے۔

گورنر سندھ عمران اسماعیل نے مزید کہا کہ پاکستان مضبوط باہمی سفارتی رابطوں کے ذریعے ہالینڈ کے ساتھ اپنے تعلقات کو مستحکم رکھنا چاہتا ہے۔

اس موقع پر ہالینڈ کے سفیر ولیم واؤٹر پلمپ نے کہا کہ پاکستان اور ہالینڈ کے لئے زراعت اور ڈیری فارمنگ کے شعبے میں بڑی صلاحیت اور گنجائش ہے۔ ہالینڈ کے سرمایہ کار بھی پاکستان میں سرمایہ کاری کرنے میں دلچسپی رکھتے ہیں۔