وفاقی وزیر برائے سائنس و ٹیکنالوجی شبلی فراز نے کہا ہے کہ پاکستانی تارکین وطن کے ساتھ قریبی رابطہ اور تعاون انتہائی اہمیت کا حامل ہے کیونکہ وہ ملک کی سماجی و معاشی ترقی میں بہت بڑا کردار ادا کرسکتے ہیں۔

تفصیلات کے مطابق وزارت سائنس و ٹیکنالوجی کی جانب سے پاکستانی نثراد ماہرین کے ساتھ رابطہ بڑھانے کے حوالے سے اہم اجلاس ہوا جس میں شبلی فراز نے سلیکون ویلی کی معروف کمپنیوں کے پاکستانی نژاد ماہرین سے آن لائن ملاقات کی۔

[amazonad category=”Electronics”]

اس موقع پر سائنس اور ٹیکنالوجی کے میدان میں ترقی کے امور پر تفصیلی گفتگو کی گئی۔

اجلاس میں فیصلہ کیا گیا کہ سائنس و ٹیکنالوجی میں انسانی وسائل کی ترقی، زراعت اور ایکوا ایگریکلچر ، چپ ڈیزائننگ ، سائبر سیکوریٹی اور بیٹریز جیسے شعبوں پر خصوصی توجہ دی جائے گی۔

اس موقع پر وفاقی وزیر برائے سائنس و ٹیکنالوجی شبلی فراز نے نوجوانوں کو ان ضروری صلاحیتوں سے آراستہ کرنے کی ضرورت پر زور دیا۔

وفاقی وزیر برائے سائنس و ٹیکنالوجی نے کہا کہ کہ ڈگری حاصل کرنے کے باوجود پاکستانی نوجوانوں میں مناسب تربیت اور ہنر کا فقدان ہے، تربیت اور ہنر سے وہ مقامی اور بین الاقوامی سطح پر اچھی ملازمت حاصل کر سکتے ہیں۔

شبلی فراز نے یہ بھی کہا کہ اس طرح کے رابطوں سے پاکستانی تارکین وطن کی حقیقی صلاحیتوں سے استفادہ کرنے میں بہت مدد ملے گی۔

وفاقی وزیر برائے سائنس و ٹیکنالوجی شبلی فراز نے مزید کہا کہ پاکستان سائنس و ٹیکنالوجی کی ترقی کیلئے سلیکون ویلی اور دنیا کے دیگر حصوں سے تعلق رکھنے والے معروف پاکستانی نژاد ماہرین کے تجربوں سے استفادہ کر سکتا ہے۔