پیپلز پارٹی کے رہنما اور صوبائی وزیر اویس قادر شاہ نے کہا ہے کہ کراچی میں بیٹھ کر سندھ کو تقسیم کرنے کی بات شرمناک ہے۔

تفصیلات کے مطابق پیپلز پارٹی کے رہنما اور صوبائی وزیر اویس قادر شاہ نے وفاقی وزیر اطلاعات فواد چوہدری کے بیان پر ردِ عمل دیتے ہوئے کہا کہ پیپلز پارٹی کی لیڈر شپ عوام کے لئے بہترفیصلے کا مینڈیٹ رکھتی ہے اور کرتی ہے۔

اویس قادر شاہ نے کہا کہ ملک میں اس وقت کس کو کہاں سے ڈکٹیشن مل رہی ہے وہ سب جانتے ہیں۔

پیپلز پارٹی کے رہنما نے یہ بھی کہا کہ سندھ کے عوام نے مینڈیٹ جمہوری لیڈرشپ کو دیا، سندھ کے عوام آپ اور آپکے پالیسی میکرز کو بہت اچھے سے جانتے ہیں۔

اویس قادر شاہ کا کہنا تھا کہ سندھ کا پیسہ پورے ملک پر خرچ ہوتا ہے صرف این آئی سی وی ڈی ہی جاکر دیکھیں۔

پیپلز پارٹی کے رہنما اور صوبائی وزیر اویس قادر شاہ کا مزید کہنا تھا کہ کراچی میں بیٹھ کر سندھ کو تقسیم کرنے کی بات شرمناک ہے۔ آپ ہیں ہی غیر جمہوری ، آپ کچھ اچھا نہ کر سکتے ہیں اور نہ بول سکتے ہیں لہذا خاموش رہا کریں۔

واضح رہے اس سے قبل وفاقی وزیر اطلاعات فوادچوہدری نے پریس کا نفرنس کرتے ہوئے کہا تھا کہ ہم چاہتے ہیں ایسا انتخاب ہوجس میں کسی کواعتراض نہ ہو، سندھ حکومت چاہتی ہے وفاق پیسہ براہ راست انہیں دے لیکن اگر سندھ کوپیسہ دیا تو لاڑکانہ ، گھوٹکی کے بجائے پیرس ، دبئی ، لندن میں لگے گا۔

وفاقی وزیر اطلاعات فوادچوہدری کا مزید کہنا تھا کہ وزیراعلیٰ سندھ بے اختیار ہیں، اہم فیصلے وزیراعلیٰ ہاؤس نہیں، بلاول ہاؤس میں ہوتے ہیں۔