وزیرخزانہ شوکت ترین نے کہا ہے کہ ن لیگ کے غلط فیصلے سے ملکی معیشت کو 20 ارب ڈالر کا نقصان ہوا ہے۔

تفصیلات کے مطابق وزیرخزانہ شوکت ترین نے اپنے ایک بیان میں کہا کہ حکومت ٹیکس بیس کو بڑھائے گی۔

انہوں نے کہا کہ حکومت بجٹ میں کوئی نیا ٹیکس نہیں لگائے گی ،4 ہزار 700 ارب کا ٹیکس ہدف پورا کریں گے۔

شوکت ترین نے یہ بھی کہا کہ ن لیگ کو پتہ ہے اسحاق ڈار نے معیشت کے ساتھ کیا کیا ہے۔

وزیرخزانہ کا کہنا تھا کہ ماضی میں قرضے لے کر معیشت کو بہتر دکھانے کی کوشش کی گئی ہے۔

انہوں نے کہا کہ ن لیگ دور میں روپے کو مصنوعی طریقے سے مستحکم رکھا گیا۔

شوکت ترین نے یہ بھی کہا کہ مجبوراًموجودہ حکومت کو آئی ایم ایف کے پاس جانا پڑا، آئی ایم ایف کے پاس جانے سے اضافی ٹیرف لگانے پڑے۔

وزیرخزانہ کا کہنا تھا کہ کورونا وباء کے باوجود حکومت اقتصادی شرح نمو 4 فیصد تک لے آئی ہے۔

انہوں نے کہا کہ سابق حکومت نے پاور منصوبوں میں پلاننگ نہیں کی تھی ،ہمارا ہدف ہے کہ ٹیکس ریونیو ہرسال 20 فیصد بڑھائیں۔

شوکت ترین نے یہ بھی کہا کہ اگلے مالی سال میں ملکی اقتصادی شرح نمو 5 فیصد رہنے کی توقع ہے۔

وزیرخزانہ کا کہنا تھا کہ اسحاق ڈار جو کچھ کر گئے اسے موجودہ حکومت نے بھگتا،ہم کیپسٹی پیمنٹ دے دے کر تھک گئے۔

انہوں نے کہا کہ آئی ایم ایف نے نئے بجٹ کو 140 ارب روپے کے نئے ٹیکس لگانے کو کہا جس کو ہم نے نہیں مانا،آئی ایم ایف نے شرح سود 13.25 فیصد کرنے کے لئے ہماری کنپٹی پر بندوق رکھی تھی.

شوکت ترین نے یہ بھی کہا کہ معاشی ٹیم نے ان سے مذاکرات کیے لیکن انہوں نے ہماری معاشی ٹیم کی بات نہیں مانی۔

وزیرخزانہ کا کہنا تھا کہ 1500 ارب روپے قرضے پر شرح سود ہوگی تو پالیسی ریٹ کی وجہ سے 500 ارب مزید اضافہ ہوگا۔

انہوں نے کہا کہ پیٹرولیم ڈویلپمنٹ لیوی سابق وزیر خزانہ مفتاح اسماعیل 30 روپے تک لے گئے جبکہ اب ہم نے پیٹرولیم لیوی کو 2 سے 3 روپے کردیا ہے۔

شوکت ترین نے یہ بھی کہا کہ آئی ایم ایف معاہدہ ختم نہیں ہوگا بلکہ جاری رہے گا ،آئی ایم ایف کو بتایا ہے کہ بجلی اور گیس کے نرخ نہیں بڑھائیں گے۔

انہوں نے کہا کہ گردشی قرضہ کم ہورہا ہے مزید کم کرنے کے لئے اقدامات بھی کریں گے۔

وزیرخزانہ شوکت ترین کا مزید کہنا تھا کہ غربت کے خاتمے کے لئے 40 لاکھ خاندانوں کو گھر اور صحت کارڈ سمیت ہنر دیں گے۔